သူဟာ မပြီးဆုံးသေးတဲ့ ကဗျာတစ်ပုဒ် ဖြစ်တယ်။
ကျွန်တော့်မှာမပြီးဆုံးသေးတဲ့
ကဗျာတစ်ပုဒ်ရှိတဲ့အကြောင်း ခင်ဗျားကို ပြောပြချင်တယ်။
ကဗျာအကြောင်းပြောပြီဆိုမှတော့ ကျွန်တော်တို့တွေ ကဗျာအကြောင်းကို
အကြမ်းဖျဉ်းသိထားဖို့တော့ လိုမယ်လေ။ ကျွန်တော်ကလည်း ခက်ပါတယ်။
သီအိုရီတွေနဲ့ တွက်ချက်ထားတာတွေကို သိပ်သဘောမတွေ့ဘူး။ ကျွန်တော် ထင်ပါတယ်။
ခင်ဗျားလည်း နှစ်သက်မှာ မဟုတ်ဘူး။ ဒီတော့ ကဗျာဆိုတဲ့အရာကို လူတွေဆီကပဲ
ကျွန်တော်တို့ သွားကြည့်ရအောင်။
လူတွေဟာ
နူးညံပြီးလှပတဲ့ အရာတွေကိုကဗျာနဲ့ တင်စားလေ့ ရှိကြတယ်။ အရမ်းလှပတဲ့
ရှုခင်းတစ်ခုခုကိုပဲ တွေ့တွေ့၊ နူးညံပျော့ပျောင်းသပ်ရပ်တဲ့
အရာဝတ္ထုတစ်ခုခုကိုပဲ တွေ့တွေ့ပေါ့။ ဒါပေမဲ့ အဲဒါဟာ မလုံလောက်ဘူး။ ကျွန်တော်
ထင်တယ်။ ကဗျာဟာ နူးညံမှုမှာ ရှိသလို၊ ရဲရင့်မှုမှာလည်း ရှိတယ်။ လှပမှုမှာ
ရှိသလို၊ ခက်ထန်မှုမှာလည်း ရှိတယ်။ စသဖြင့်ပေါ့။ ဟုတ်ပါတယ်၊ အရာရာမှာ
ကဗျာတွေ ရှိကြတယ်။
ကဗျာဖန်တီးတဲ့သူအတော်များများ
(၉၉.၉၉%) မှာ ဘယ်သူမှ မဖတ်ဖူးသေးတဲ့၊ ဘယ်သူမှ မဖတ်ဖြစ်လိုက်တဲ့၊ ဘယ်သူမှ
ဖတ်ဖို့ မပြဖြစ်လိုက်တဲ့ ကဗျာတွေ ရှိနိုင်တယ်။ တစ်ပုဒ်တည်းသော် လည်းကောင်း၊
တစ်ပုဒ်ထက်ပို၍သော် လည်းကောင်းပေါ့။ အဲဒီလိုပါပဲ။
ကျွန်တော့်မှာလည်းဘယ်သူ့ကိုမှ ထုတ်မပြဖြစ်တဲ့ ကဗျာတစ်ပုဒ်ရှိတယ်။
အဲဒီကဗျာဟာ
တစ်ခါတရံမှာ ခက်ထန်ပြီး၊ တစ်ခါတရံမှာ နူးညံတယ်။ တစ်ခါတရံမှာ
ပုံရိပ်ဆန်ပြီး၊ တစ်ခါတရံမှာ အဝေးကို ပျံသွားတတ်တယ်။ သူဟာ
ပင်လယ်လှိုင်းလေးတွေနဲ့လည်း တူတယ်။ အတက်အကျ ရှိတယ်။ တစ်ခါတလေ
ဝိုင်းဒိုင်းကျဲသောင်းကျန်းတတ်ပြီး၊ ကျန်အချိန်တွေမှာတော့
တိတ်ဆိတ်ငြိမ်သက်နေတတ်တယ်။
သူဟာ ကျွန်တော့်ရဲ့
ဆွေးနွေးဖော်လည်း ဖြစ်တယ်။ ဆိုပါတော့ တစ်စုံတစ်ခုကို ကျွန်တော်မ၀ံ့ရဲတဲ့အခါ
သူက ကူညီလေ့ရှိတယ်။ သူဟာ ကျွန်တော့်ကို အားပေးနှစ်သိမ့်တတ်သူလည်း ဖြစ်တယ်။
အားအင်ကုန်ခမ်းနေတဲ့ အခါမျိုးမှာပဲဖြစ်ဖြစ်၊ အရမ်းစိတ်ညစ်နေတဲ့
အခါမျိုးမှာပဲ ဖြစ်ဖြစ်ပေါ့။ သူက ပြောတယ်။ “ ဟိုးကောင်းကင်ကို ကြည့်ပါဦး။
ဒီနေ့ မိုးမရွာဘူးနော်။ အေးလေသူ့အချိန်မှ မဟုတ်ဘဲ။ အချိန်တန်တော့
ရွာမှာပေါ့။ ” တဲ့။
တစ်ခါတရံမှာ သူက မာမာထန်ထန်လည်း
ဆက်ဆံတတ်တယ်။ တစ်စုံတစ်ရာကို ကျွန်တော် ကြောက်ရွံနေတဲ့
အခါမျိုးမှာပဲဖြစ်ဖြစ်၊ မလိုအပ်ဘဲ တစ်စုံတစ်ခုကိုအားနာနေတဲ့ အခါမျိုးမှာပဲ
ဖြစ်ဖြစ်ပေါ့။ သူ့ရဲ့ ခက်ထန်မှုကို ကျွန်တော် စိုးရွံ့တယ်။ ကျွန်တော်က
သူ့ကို ပြောတယ်။ “ ဒီနေ့လည်းမိုးမရွာဘူးနော် ” လို့။ သူ တိတ်ဆိတ်သွားတယ်။
တခဏလေးပဲ ဖြစ်ဖြစ်ပေါ့။ ပြီးတော့မှ တစ်လုံးချင်း ပြောချတယ်။ “ နင်
ရဲရင့်ပြတ်သားလာရင် အဲဒီမိုးတွေ အလိုလိုရွာလာလိမ့်မယ်။ ” တဲ့။
ကျွန်တော်ကလည်း
ကျွန်တော်ပါပဲ။ သူတည်ငြိမ်နေတာ မြင်ရင် တစ်ခုခုနဲ့ စ ချင်တယ်။
သူစိတ်ဆိုးလာတဲ့အခါ ကျွန်တော့်ကို မခေါ်ဘူး။ အဲဒီလို ဆိုရင်လည်း
မနေတတ်ပြန်ဘူး။ ကျွန်တော် သူ့ကို ပျော်နေစေချင်တယ်။ အဲဒီလိုပါပဲ
ကျွန်တော်လည်း ပျော်နေချင်တယ်။ ကျွန်တော်ဟာ သူမရှိရင် မဖြစ်ဘူးလို့
တစ်ခါတစ်ခါ ခံစားရတယ်။ တစ်ခါတစ်ခါပဲ ဖြစ်တဲ့အတွက် အမြဲလိုလိုတော့လည်း
မဟုတ်ပြန်ဘူး။
တကယ်တော့ အဲဒီကျွန်တော်ဟာ ရူးနေတဲ့
ကောင်ပဲ ဖြစ်လိမ့်မယ်။ သူ့ကိုချစ်သလိုလိုနဲ့ ကိုယ်ကိုယ်ကို ပိုချစ်တတ်တယ်။
သူ့ကို စွဲလန်းသလိုလိုနဲ့ ကိုယ်ကိုယ်ကို ပိုစွဲလန်းတတ်တယ်။ သူ့ရဲ့
ဆုံးမသံတွေ ကြားတိုင်း ကျွန်တော်ဟာ ကလေးငယ်လေးတစ်ယောက် ဖြစ်သွားတယ်။ သူ့ရဲ့
ယုံကြည်အားကိုးတဲ့ မျက်ဝန်းတွေနဲ့ ဆုံတိုင်း ကျွန်တော်ဟာ ရဲရင့်တဲ့
စစ်သူကြီးတစ်ယောက် ဖြစ်သွားပြန်တယ်။ ကျွန်တော့်ရဲ့ အရာရာကို သူဟာ
ပုံဖော်နိုင်စွမ်းရှိနေတတ်တယ်။
ကျွန်တော်ဟာ
ကိုယ့်ကိုယ်ကို ငြင်းဖို့ ကြိုးစားရင်းနဲ့ သူ့ကိုလည်း ငြင်းတတ်လာတယ်။
တစ်ခါတရံမှာ သူက သည်းခံပြီး၊ တစ်ခါတရံကျတော့လည်း အဝေးကို ပျံသွားပြန်ရော။
အရာရာကို လွှမ်းမိုးချင်တဲ့ သူ့ကို အလျှော့ပေးရပါများလို့ ကျွန်တော်လည်း
လျော့ရဲရဲဖြစ်လာတယ်။ အဲဒီလို ဆိုတော့လည်း သူက မကြိုက်ပြန်ပါဘူး။ သူ့ကို
နားလည်ဖို့ ကြိုးစားရင်းနဲ့ ကျွန်တော့်ကို ကျွန်တော်ပဲ ပိုပိုနားလည်လာတယ်။
တကယ်တော့
ကျွန်တော်တို့ဟာ မျဉ်းတစ်ကြောင်းတည်းပေါ်မှာ အကွာအဝေး တူညီစွာ၊
ရွေ့လျားတဲ့အရှိန် တူညီစွာနဲ့ ရှိနေကြသူတွေပဲ ဖြစ်တယ်။ ဒါကြောင့်မို့ သူနဲ့
ကျွန်တော် ဘယ်တော့မှ မဆုံဘူး။ သူ့ကို ကျွန်တော် ဘယ်တော့မှ အဆုံးသတ်လို့
မရဘူး။ သူ့ကို သူပဲ အဆုံးသတ်ရလိမ့်မယ်။ ကျွန်တော့်ကို ကျွန်တော်ပဲ
အဆုံးသတ်ရလိမ့်မယ်။
ရယ်စရာ ကောင်းပါတယ်။ တကယ်တော့
သူဟာဘယ်တုန်းကမှ ကဗျာတစ်ပုဒ်မဖြစ်ခဲ့ဖူးသလို၊ ကျွန်တော်ဟာလည်း
ကဗျာတစ်ပုဒ်ကို ပြီးဆုံးအောင် မရေးတတ်သေးတဲ့ ကဗျာဆရာတစ်ယောက်သာ ဖြစ်ပါတယ်။
ကြယ်စစ်သည်
၂၄ ဇူလိုင် ၂၀၁၃
